Iskustva nastavnika sa online nastavom: Mama peče uštipke, moram da idem

"Majka napravila uštipke i svi jedu, ništa meni neće ostat', a meki k'o duša," kazao je jedan od učenika u toku online nastave.


Nikome nije lako da se na posao i učenje koncentriše od kuće, ali mali osnovci su ozbiljno zaprepastili, pa i zasmijali svoje drugare i profesore u “online učionici”. Dječaci i djevojčice u pubertetu, koje jedva smiruju i na časovima, nastavnici su morali da “dovedu u red” preko mreže, prenosi Oslobodjenje.

Nije im bilo lako, ovo je samo dio nestašluka koji su doživjeli nastavnici od svojih učenika, dok su se i sami možda borili sa svojim nestašnim ukućanima.

Svinje kao izgovor

Dok su se svi koncentrisali na čas, jedan učenik bavio se drugim stvarima – odalo ga je neobično lupkanje.

– Šta je to, upitala je zbunjena nastavnica.

– Joj, izvinite, nastavnice, siječem slaninu, glasio je odgovor.

Dok je on rezao slaninu, drugi se uključio u pomoć roditeljima oko svinjogojstva. Na selu je to normalno, djeca moraju da pomažu, da namire stoku…

– Izvinite, morao sam da nahranim svinje, bio je njegov izgovor pred profesoricom.

Opravdano, vala – zna momčić od čega se živi.

Hrana je često bila izgovor mališana.

– Sad ću da stignem, samo da jedem, jedna je od poruka koju su profesori sačuvali.

Pa, nije to lako, u školi postoje odmori, zvonce, vrijeme za užinu, a u kući po cijeli dan miriše nešto iz kuhinje. I još ako imaju brata ili sestru…

– Moj šestak se uzvrpoljio, vidim nešto nije baš, baš. Inače je dobar đak, vrijedan. Pitam ga: “Ima li problema?, kazao je jedan profesor.

Kaže: “Ma jok, nego majka napravila uštipke i svi jedu, ništa meni neće ostat’, a meki k'o duša” – otvorio je dušu ovaj dječak.

Neke mame ne praštaju izostanke sa ručka.

Kako utišati mamu

– Nekoliko puta sam na jednom času zamolila đaka da utiša mamu jer je uporno vikala iz kuhinje i dozivala ukućane da jedu. On je zatvorio vrata od sobe, par puta rekao mami da je na času i da bude tiša, ali se opet čulo njeno dozivanje…

Učenik je imao ideju – da se njeno ponašanje upiše u njegov e-dnevnik kao napomena za vladanje, pa će mama da pročita poruku kada uđe u aplikaciju e-dnevnika. Moramo priznati da je ovo dobra ideja.

E sad, ima i onih koji prevrše svaku mjeru, ali kako ih iskontrolisati? Nije to lako kao u učionici, kad im prekipi, a nastavnici udare u sto onim starim dnevnikom sa debelim koricama.

– Učenik je prisustvovao času u realnom vremenu, ali za vrijeme cijelog časa prži jaja u kuhinji i pravi buku i jede, jedan je od komentara upisanih u e-dnevnik.

Nekima nije bilo baš lako da organizuju vrijeme. Prvi čas je ujutro. Jedna djevojčica je imala problem…

– Je l’ mogu da odem da operem zube? Nisam stigla, a ne mogu ovako…

Da vrijeme može i da stane na internetu, svima je poznato kao “bag”. Ali, da li je kulturno ovako se obratiti nastavnici:

– Nešto ste zabagovali, ne pomjerate se.

Turčin i lord

A kada želite da pobjegnete sa časa, ima li boljeg izgovora od toga da nemate interneta, osim kada tu poruku ipak pošaljete preko interneta – a i to se dešavalo.

Online nastava idealna je prilika za mame da se i one uključe, da bodre svoju djecu, da ih kontrolišu… Ali, nije baš zgodno kada se i mama pojavi na času, tj. u dometu kamere, posebno kada je vrijeme za ocjenjivanje.

– Ispitujem petaka čitanje i prijevod i vidim da sve vrijeme gleda na gore lijevo… Uzvrtio se. Ja ga pitam u čemu je problem? Pojavljuje se mama na ekranu iz tog lijevog ugla i kaže:

 – Jao, izvinite, možda je zbog mene nervozan jer kontrolišem kako čita! Ja šta ću, nasmijah se, poželih gospođi “Dobar dan”, a ona kao ode. Međutim, iako je odglumila korake i dalje joj je u lijevom uglu virio baš lijep bijeli čupkavi džemperić.

E sad, nekada je pratnja i poželjna. Pomoć brata, recimo.

– Đak kojeg sam jedva uganjala da odgovara usmeno na video poziv jer je u toku redovne nastave mnogo izostajao, krenuo je sa odgovaranjem uz pomoć brata, a sjenka brata koji mlatara rukama iza ekrana je bila svuda po zidu. Pozvala sam brata da i on dođe pred ekran, siti se ispričali na engleskom, neko kao Turčin, a neko kao grof iz Londona, ali mlađi bratac progovorio kao nikada na času prije. I tako je ipak poštenije uz tuc-muc zaradio željenu dvojkicu, izjavila je jedna nastavnica.